1Ti 4 | KYG | STEP | Goti Auneme'amo'mo huno ha leno huno'ae'mo, henaga'amo mago vaya'mogi hosu apaune vaya'ai gemo afige hosu enisole vaya'mogi ali'a apaya malesaya gemo afige hute'a siosi vaya'mogi apakesa afi'a fatago nehaya gemo atale'a ugae, huno hu'niye.

1 Timothy 4

Henaga'amo hosu gemo ali'a apaya malesaya vaya'aife'mo apava gemo hu'niya gemae

1 Goti Auneme'amo'mo huno ha leno huno'ae'mo, henaga'amo mago vaya'mogi hosu apaune vaya'ai gemo afige hosu enisole vaya'mogi ali'a apaya malesaya gemo afige hute'a siosi vaya'mogi apakesa afi'a fatago nehaya gemo atale'a ugae, huno hu'niye. 2 Apavayaleti'mo aigofe gemo hugaya'monanafa apakupi mafa'nemo ago fali'negekana huno mai'niye. 3 Apakaemo, a'mo o'alige vele'mo o'maige ne'ya'mo mosige hutapa maiyo, hu'a ali'a apaya malegae. Goti'a apakesa afi'a fatago huge lama ge'amo afi'a aeto huge nehisaya vaya'mogimo ne'ya'mo ali'ne'a agaefeke'mo hao ke hete'a nesayafe'mo muki ne'ya'amo alo hu male'niye. 4 Muki alo hu'niya ya'amo alagepa ya'age'mo hane'niyanageta lagaemo alita atalesuna ya'mo ohane'nifa ali'netae'mo Gotife'mo hao ke heteta alita nesuna ya'mo hane'niye. 5 Goti'a afa'a negae, huno hu'niyanageta nunumu'mo huteta afa'a alita negaune.

Timotife'mo alagepa huka ali'ya'mo aliyo, huno ha pai'niya gemae

6 Kagaemo konagatimogife'mo ani kavafe'mo alika apaya malesana'mo'mo Yesu Kalaisi alagepa ali'ya veka'amo maigane. Lagesa afita fatago nehuna gemo alagepa huka akame hu'nana gemo ne'ya'mo alika negekana huka alika nesanageno'ae'mo lokiya vaino kategaiye. 7 Kategaiya'monanafa ma mopafi gemo aote ohane'niya gemo anekalo a'ne'ai kaitene gemo o'afika yokalo legefe'mo ae'a apakasesayafe'mo teleninimo nehaya kava huka Gotife'mo alagepa huka mono hisanafe'mo teleninimo huvo. 8 Apakufaleti'mo teleninimo nehaya kava'mo'mo aise'amo hapa maegaiya'monanafa mono kava'mo'a muki alagepa kavatefe'mo laha maegaiye. Goti'a, alagepa mono nehaya kava'mo'a afa'a maisaya kavatefe'mo hemeni'e afole aisiya afina'e'mo lapa maegaiye, huno polomasi gemo hu'niye. 9 Mani nehuna gee'mo lama gemo apakesa afi'a fatago hute'a alisaya gemo hane'niye. 10 Ani gelefe'mo ali'ya'mo ne'alune. Goti'a muki vaya'mo hapa ne'maeya'monanafa apakesa afi'a fatago nehaya vaya'ai apakufamo alino katino apateno hapau ne'vaiya vekae'mo lavayagunagu huta agava ne'mauna'mofe'mo hu'a faipa hu'a nelatagetae'mo ali'ya'amo ne'alune.

11 Ani kava'mo hiyo, huka huge alika apaya malege huka maiyo. 12 Kagaemo apakesa afi'a fatago nehaya vaya'mogi kakame hisayafe'mo alagepa gemo huge alagepa kava'mo huge kahau kayamopafi'mo kahauge kayamukiki huge alagepa huka kagesa afika fatago huge yaveyave kava'mo huge huka maige'apao afa neya vekamo mai'niye, hu'a osiyo. 13 Kagaemo Goti ge'amo alagepa hu'a lekana paige ani kava'mo hiyo, hu'a ae'a hakalo hu'a hapa paige ali'a apaya malege hisayafe'mo yagaika apateme apateme ne'uge'na eno. 14 Yagai'a ne'apataya vayatama vaya'mogi kagaete'mo apaya'mo male'a katete'a Gotitegati'mo ali'naya geleti'mo ali'ya'amo alisanafe'mo lokiya'amo ali'a kami'nae. Fiku yanageno kami'naya ya'mo afa'a hanegaiyanagi kami'naya yateti'mo ali'ya'mo aliyo. 15 Ani kavatefe'mo kagesa afifi huka mai'nekae'mo lokiya vaika ali'ya'mo alige'apao alagepa kavakamo'mo kosime kosime ne'viya kavakamo muki'amogimo ageyo. 16 Kagaikale'mo alagepa huka yagai'neka alika apaya ne'malana kavate'mo yagaika maiyo. Yagaime yagaime uka maiyo kagaika kagufamo alika katika kateteka gekamo ne'afiya vaya'ai apakufamo alika katika apategananagi.